Ջերմուկում իրավիճակը խաղաղ է: Ֆեյսբուքյան էջում գրել է Ջերմուկի քաղաքապետ Վահագն Արսենյանը․ «Հարգելի հայրենակիցներ, պատասխանում եմ ձեզ անհանգստացնող հարցերին, Ջերմուկում իրավիճակը խաղաղ է: Հետևեք միայն ՀՀ պաշտպանության նախարարության կայքի լրահոսին»,- գրել է Արսենյանը:
Ադրբեջանի ՊՆ-ն հայտնել է 3 զինծառայողի մահվան մասին: Տեղեկությունը հրապարակել է haqqin.az-ը: Ըստ պաշտոնական աղբյուրի, զոհվել են ադրբեջանական բանակի զինծառայողներ Վիդադի Զալովը, Էլշադ Հասանովը և Սաբուհի Թաղիևը։ Հիշեցնենք՝ ՀՀ ՊՆ-ից հաղորդում են, որ ադրբեջանական կողմն ունի մեծաթիվ զոհեր և վիրավորներ:
Ռուսական խաղաղապահ զորախումբը շարունակում է առաջադրանքներ իրականացնել Լեռնային Ղարաբաղի տարածքում։ Երեսուն դիտակետերում ռուս խաղաղապահները շուրջօրյա վերահսկում են իրավիճակը և հետևում հրադադարի ռեժիմի պահպանմանը։ Ինչպես նշվում է ՌԴ ՊՆ տեղեկագրում, Մարտունու շրջանում արձանագրվել է հրադադարի ռեժիմի խախտման երկու դեպք։ Տուժածներ չկան։ Ռուսական խաղաղապահ զորախմբի հրամանատարությունը հայկական և ադրբեջանական կողմերի հետ հետաքննություն է անցկացնում այս փաստի առնչությամբ:
Հարավային Կորեայի Կաննին քաղաքի շրջանում բնական հրդեհի պատճառով առնվազն 40 տուն է ավերվել, այրվել են անտառային զանգվածի զգալի տարածքներ։ Ավելի քան 300 տեղացիներ և մոտ 700 զբոսաշրջիկներ ստիպված են եղել լքել վտանգավոր շրջանը։ Քաղաքի հրշեջ ծառայության տվյալներով՝ ավերվել է 28 առանձնատուն, 12 պանսիոնատ և 4 Հյուրանոց, զոհերի մասին այս պահին չի հաղորդվում:
