Օրեր առաջ ՔՊ-ական պատգամավոր Գագիկ Մելքոնյանը հայտարարել էր, որ Կրեմլի ցուցումով Արշակ Կարապետյանը նշանակվել է Պաշտպանության նախարար:
Վարչապետ Նիկոլ Փաշինյանն այսօր անդրադարձավ այդ հայտարարությանը և նշեց.
«Հիշում եք՝ դրանից առաջ Կարապետյանը եղել է իմ խորհրդականը: Նրան ԳՇ պետի տեղակալ և Պաշտպանության նախարար նշանակելու հարցում անտեսված չեն եղել նրա հատուկ հարաբերությունները ՌԴ մի շարք շրջանակների հետ: Որոշակի իրավիճակներում մտածում ենք՝ լավ, ի՞նչն այն չենք անում մեր դաշնակիցների հետ հարաբերություններում, կարո՞ղ է ինչ-որ լրացուցիչ ժեստեր անենք, որպեսզի մեր անվտանգային համակարգերը նորմալ սկսեն գործել:
Բայց եկեք արձանագրենք, որ Արշակ Կարապետյանը, գոնե իմ պաշտոնավարման ընթացքում, գուցե նաև Երրորդ Հանրապետության ընթացքում ամենակարճ պաշտոնավարած պաշտպանության նախարարն է: Ես որոշում եմ կայացրել նրան հանել աշխատանքից: Ուզո՞ւմ եք ասեմ՝ ինչն է եղել պատճառը: 2021 թվականի նոյեմբերի 14-ի առավոտյան Արշակ Կարապետյանն ինձ զեկուցել է, որ սահմանի երկայնքով ամեն ինչ հանգիստ է, մինչդեռ իր զեկուցման պահին մեր սահմանի մի շարք տեղամասերում ադրբեջանական զորքերը ներխուժած են եղել ՀՀ տարածք, նույնիսկ դիրքեր են վերցրած եղել։ Եվ Արշակ Կարապետյանը, լինել պաշտպանության նախարար, երկու տարբերակ կար՝ որ կա՛մ տեղյակ չի եղել, կա՛մ էլ տեղյակ լինելով՝ ինձ չի զեկուցել: Նման իրավիճակներում ես որևէ մեկին նույնիսկ կես ժամ չեմ հանդուրժի այդ պաշտոնում»։
