«Հայաստանում նոր ընտրություններն անթույլատրելի են, դա պատասխանատվությունից փախչել է»,- ԱԺ-ում լրագրողների հետ ճեպազրույցում ասաց ԱԺ նախագահ Ալեն Սիմոնյանը՝ պատասխանելով հարցին, թե իշխանությունը պատրաստվո՞ւմ է արտահերթ ընտրություններ անցկացնել։
Նա նշեց, որ Հայաստանի քաղաքացիներն արդեն իրենց ընտրությունը կատարել են, նման հարց չի քննարկվում ու չի քննարկվել։
«Մենք վերցրել ենք պատասխանատվություն, մինչև վերջ կտանենք։ Մենք առաքելություն ունենք՝ Հայաստան ու տարածաշրջան խաղաղություն բերելն է, դրանից հետո կգա ընտրությունների ժամանակը, մենք կներկայացնենք մեր տեսլականը, ընդդիմադիրներն՝ իրենց, ու Հայաստանի ժողովուրդը կրկին կգնա ազատ, արդար ընտրությունների ու կքվեարկի, կընտրի այն իշխանությանը, որին ճիշտ կգտնի»,- հայտարարեց ԱԺ նախագահը։
