Վարչապետ Նիկոլ Փաշինյանի որոշմամբ էկոնոմիկայի նախարարի տեղակալի պաշտոնից նախօրեին ազատված և այսօր ձերբակալված 31-ամյա Անի Իսպիրյանը Հայաստան էր հրավիրվել 2020թ-ին՝ ՀՀ կառավարությունում սփյուռքահայ մասնագետների «իԳործ» ծրագրով: Մինչ այդ նա բնակվում էր Մոսկվայում և որպես փորձագետ աշխատում էր ՌԴ նախագահին առընթեր ազգային տնտեսության և պետական կառավարման ռուսական ակադեմիայի արտաքին կապերի եւ արարողակարգի վարչությունում:
Նախքան փոխնախարար նշանակվելը՝ 2020-2021թթ․ Իսպիրյանը հանդիսացել է «իԳործ» ծրագրի փորձագետը: Նշենք, որ «իԳործ»-ի շրջանակներում սփյուռքահայ մասնագետները պետական մակարդակով հրավիրվում են աշխատանքի ՀՀ կառավարությունում և այլ գերատեսչություններում:
