Սեպտեմբերի 13-ի հորդառատ անձրևների հետևանքով մայրաքաղաքի բազմաթիվ հասցեներում ջրի կուտակումներ են եղել։ Երևույթը ևս մեկ անգամ վկայեց, որ ունենք թերի կառուցված համակարգ և լուրջ վերակառուցման անհրաժեշտություն է զգացվում այս համակարգում, քաղաքապետարանի գործակարգավորական նիստի ընթացքում հայտարարեց քաղաքապետի խորհրդական Կամո Արեյանը։
«Շատ հատվածներում այլևս չի բավարարում թողունակությունը։ Բոլոր հետևանքներն այս պահին վերացված են, բոլոր ստորգետնյա անցումները մաքրված են, շքամուտներ ներթափանցած ջուրն էլ է մաքրված»,-ասաց Արեյանը։
Արձագանքելով՝ քաղաքապետ Տիգրան Ավինյանն ասաց, թե համաձայն է, որ հեղեղատար համակարգը բավական հին և մաշված է։
«Այդտեղ էական ներդրումների կարիք կա։ Այդ ներդրումները կարվեն, հենց այս շաբաթ կառավարությունում այդ թեմայով քննարկում ունենք։ Հիշեցնեմ, որ 2 տարի է, փաստացի, ինչ Երևան քաղաքը կոյուղի է կառուցում։ Կարևոր է նաև հասկանալ, թե ինչպես պետք է մարդիկ գործեն նմանատիպ ֆորսմաժորների դեպքում, այստեղ էլ անելիք ունենք»,-ասաց Տիգրան Ավինյանը։
