Նորայր Նորիկյանը հայտնեց, որ կացարանում զոհվածների ծնողները չեն բացառում, որ կրկնակի դատաբժշկական փորձաքննության անցկացնելու միջնորդություն կներկայացնեն։
Գեղարքունիքի մարզի Ազատ գյուղում տեղակայված զորամասի ինժեներասակրավորային վաշտի կացարանի հրդեհի դեպքով տուժողների փաստաբանը ՔԿ-ին տեղեկացրել է այդ տարածքում այլ բնույթի հանցագործությունների կատարման մասին և խնդրել` հնարավոր հանցագործությունների ու հրդեհի միջև պատճառահետևանքային կապի վերաբերյալ քննություն իրականացնել։ Փաստաբան Նորայր Նորիկյանն այսօր հրավիրված ասուլիսի ժամանակ հայտարարեց այդ մասին։
Նա հայտնել է , որ ինչպես ինքը, այնպես էլ ծնողներն անհատապես նամակներ են հղել ՀՀ պաշտպանության նախարարին` նրա հետ հանդիպման պահանջով, սակայն նախարարը ձեռնպահ է մնացել հանդիպում կազմակերպել։ Պաշտպանության նախարարին նաև դեպքի առնչությամբ փետրվարին հարցեր են ուղղել, սակայն մինչ այս պահը որևէ արձագանք չկա։
Նա հավելել է, որ մարտի 30-ին, ժամը 15-ին ծնողները զինդատախազի հետ հանդիպում կունենան։
«Միջնորդություն ենք ներկայացրել վարույթն իրականացնող մարմնին, որպեսզի պարզվի հրդեհի օրը որոշ մարդկանց` տվյալ տարածքում ներկա գտնվելու հանգամանքը։ Միջնորդություն ենք ներկայացրել նաև հարցաքննել 2 անձանց, որոնք պնդել են, որ տեղի ունեցածը դիվերսիա է եղել»,–ասաց փաստաբանը։
Մանրամասները՝ սկզբնաղբյուր կայքում
