«Որոշակի հույսեր կան հումանիտար իրադրության բարելավման վերաբերյալ, չի բացառվում, որ այսօր հումանիտար աջակցության ավելի մեծ խմբաքանակներ մտնեն ԼՂ»,-ՀՀ գործադիրի նիստում հայտնեց Նիկոլ Փաշինյանը
Նա ասաց, որ ավելի մանրամասն չի կարող ասել, որովհետև կան որոշակի պայմանավորվածություններ, որոնց իրագործումը այդ պահին պետք է մեկնարկի:
«Կմեկնարկի՞, թե՞ ոչ` չեմ կարող ասել, բայց որ կան որոշակի պայմանավորվածություններ, դա հստակ է»,-հայտարարեց Փաշինյանը:
Նա նաև հայտնեց, որ ԼՂ բնակիչները կարող են Հայաստան գալ այն պայմաններում, երբ արձանագրվի նրանց՝ Լեռնային Ղարաբաղում մնալու անհնարինությունը:
«Այո, մենք գնահատում ենք, որ այս պահին կա այդ անհնարինությունը, եթե իրավիճակը չբարելավվի՝ այդ խնդիրն, իհարկե, բոլորիս օրակարգում կլինի»,-ասաց Փաշինյանը և տեղեկացրեց, որ դեռևս սեպտեմբերի 19-ին հանձնարարական է տվել փոխվարչապետ Տիգրան Խաչատրյանին, որպեսզի կառավարության գործընկերների հետ նրանց համար 40 հազար տեղ կեցության վայր նախապատրաստեն:
Նա հայտարարեց, թե Հայաստանի կառավարության նպատակը Լեռնային Ղարաբաղը հայաթափելը չէ։
«Մենք ամեն ինչ պետք է անենք, որ մեր հայրենակիցներն ապրեն իրենց տներում առանց վախի ու արժանապատիվ»,-ասաց Փաշինյանը։
