Սիրիայում ավերիչ երկրաշարժերի զոհերի թիվը հասել է 1602-ի, վիրավորվել է 3649 մարդ։ Որոնողափրկարարական աշխատանքները շարունակվում են Իդլիբի, Հալեպի, Համայի, Լաթաքիայի և Տարտուսի շրջաններում։ Ինչպես գրում է SANA լրատվական գործակալությունը մեծ թվով շինություններ են ավերվել և վնասվել նաև Սիրիայի հյուսիսում ընդդիմության կողմից վերահսկվող շրջաններում։
Թուրքիայում փետրվարի 6-ին տեղի ունեցած ուժգին երկրաշարժի հետևանքով փլատակների տակ են մնացել նաև Դիարբեքիրում (Տիգրանակերտ) ապրող հայազգի երգչուհի Զիլան Տիգրիսը և իր ամուսինը։ Զիլան Տիգրիսը և իր ամուսինը՝ Չաղդաշ Չանքայան, դեռ չեն հանվել փլատակների տակից։ Արևմտահայոց հարցերի ուսումնասիրության կենտրոնը հույս է հայտնում, որ նրանց ողջ և առողջ կգտնեն և դուրս կբերեն այնտեղից։
Մարաշի Փազարջըքի շրջանում փետրվարի 6–ի առավոտյան ուժգին երկրաշարժից հետո վնասներ կրած քաղաքներում թալան է սկսվել։ Սոցկայքերում թուրք օգտատերերը տեղադրում են տեսանյութեր, թե ինչպես են որոշ քաղաքացիներ թալանում թե բնակարաններ, թե խանութներ։ Դրանցից մեկը ներկայացրել է թուրքական Show TV-ն։
Սիրիայում ավերիչ երկրաշարժի հետևանքով զոհերի թիվը հասել է 812-ի, տուժել է 1449 մարդ։ Այս մասին հաղորդում է ՌԻԱ Նովոստին՝ Սիրիայի առողջապահության նախարարությանը հղումով։ «Հալեպ, Լաթաքիա, Համա, Իդլիբ, Տարտուս նահանգներում զոհերի թիվը հասել է 812-ի, վիրավորներինը՝ 1449-ի»,- ասված է նախարարության հաղորդագրության մեջ։ Ավելի վաղ հաղորդվում էր 593 զոհի և 1353 վիրավորի մասին։
