Տավուշի թեմի առաջնորդ, «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը, չնայած ոստիկանական մի քանի շղթաների ու պատերի, հասել է Կիրանց։
Լրագրողի հարցին, թե ինչպե՞ս է հաջողվել, Սրբազան Հայրը ժպտացել ու պատասխանել է՝ «ուղիղ ճանապարհով»։
Պատգամավոր Արթուր Սարգսյանն ասաց, որ ինքը որպես պատգամավոր խնդրել էր ոստիկաններին թույլ տալ գոնե Սրբազանին մտնել գյուղ, սակայն մերժել են։
«Հիմա Սրբազանը գյուղում է։ Վահե Ղազարյանը թող մտածի, որ համակարգը չի գործում»,- ասաց նա։
Հիշեցնենք, որ արդեն քանի օր թույլ են տալիս Կիրանց մուտք գործել միայն կիրանցիներին, մյուս քաղաքացիների, այդ թվում ՀԱԵ Տավուշի թեմի առաջնորդ Բագրատ արքեպիսկոպոս Գալստանյանի, պատգամավորների մուտքը գյուղ արգելում են։
