Այս պահին ոստիկանական մեծ ուժեր են բերվել ՀՀ Քննչական կոմիտեի դիմաց, որտեղ 44խ-օրյա պատերազմում զոհված զինծառայողների ծնողները 24-ժամյա նստացույց են հայտարարել:
Մեծ թվով ոստիկաններ պատը են կազմել, որպեսզի ակցիայի մասնակիցները չմոտենան ՔԿ շենքին: Զոհված զինծառայողների ծնողները փակել են Մամիկոնյանց փողոցը:
44-օրյա պատերազմում զոհված զինծառայող Ժորա Սահակյանի հայրը՝ Վահիդ Սահակյանը դիմելով ոստիկաններին ասաց. «Մենք չենք հանգստանալու, թող ինձ նորից տանեն ոստիկանություն: Այսպես են անում, որ մենք մահանանք, մենք չենք մահանալու, մենք պայքարելու ենք մինչեւ վերջ, որ իմանան, թե մեր տղաների սպանության համար ովքեր են մեղավոր, որ մեղավորները սատկեն: Մեր տղերքը զոհվել են, բայց մեր տղերքին սպանողները սատկելու են»:
«Պետք լինի՝ 24 ժամ էլ կկանգնենք այստեղ։ Ամեն զինվորի մահվան լուր լսելուց նորից մեռնում ենք, հետ ենք գալիս», – վրդոված ասաց մեկ այլ ծնող։
Այստեղ են նաև ԱԺ «Հայաստան» խմբակցության պատգամավորներ Ասպրամ Կրպեյանն ու Քրիստինե Վարդանյանը:
Նշենք, որ այսօր զոհված զինծառայողների հարազատները ՔԿ-ի դիմաց 24-ժամյա նստացույց են սկսել: Նրանք պահանջում են անհապաղ պատասխանատվության ենթարկել այն 12 ոստիկաններին, որոնք «Եռաբլուրում» սեպտեմբերի 21-ին փաստացի մարմնական վնասվածքներ են հասցրել զոհված զինծառայողների ծնողներին: Նրանք բողոքում են, որ մինչ օրս որեւէ ոստիկանի մեղադրանք չի առաջադրվել:
Նախորդ տարվա սեպտեմբերի 21-ին Եռաբլուր զինվորական պանթեոնում Արցախյան երրորդ պատերազմում զոհված զինծառայողների ծնողների նկատմամբ ոստիկանության ծառայողները բռնություն էին գործադրել։ Այս դեպքով ոստիկանների ու ծնողների միջև առերեսումներ են եղել։
